PİRUZ DİLƏNÇİDƏN İLTİZAM ALINDI
24.04.2000

Milli Məclisin üzvü Mətləb Mütəllimovun şikayəti əsasında CAMAH Bakı komitəsinin sədri Piruz Dilənçinin əleyhinə başlanmış istintaq əməliyyatı iki ilə yaxın davam etdikdən sonra, ədalətsiz və qərəzli qərarla yekunlaşmaq ərəfəsindədir.
Azərbaycan Respublikası CM-nin 122-ci maddəsinin 2-ci hissəsi ilə əleyhinə cinayət işi qaldırılmış P.Dilənçi bu gün yenidən Yasamal Rayon Prokurorluğuna çağırılmışdır. Orada qanuna uyğun P.Dilənçiyə mövcud cinayət işinin matriyalları ilə tanış olmaq imkanı verilmiş, qanunun müvafiq bənd və maddələri ona izah edilərək sonuncu dəfə özünü müdafiə etməyə səlahiyyəti olduğu bildirilmişdir. P.Dilənçi işin tapşırıq əsasında ədalətsiz aparıldığına etiraz olaraq təkrar izahat verməkdən imtina etmiş, M.Mütəllimov barədə söylədiklərini bir daha təsdiqləmişdir. Üstəlik o, respublikanın ən ali qanunverici oqanında Mütəllimov kimi simasız şəxsin təmsil olunmasından təəssüfləndiyini də əlavə etmişdir. 
Sonda, P.Dilənçinin rəsmi ittihamı oxunaraq, «şərq» qəzetinin 5 yanvar 1999-cu il və «Etimad» qəzetinin 9 fevral 2000-ci il tarixli nömrələrində verdiyi müsahibəyə görə təqsirkar hesab edilmişdir.
Nəhayət yaxın günlərdə məhkəmənin son iclasının keçiriləcəyi zamana qədər, prokurorluq qəti imkan tədbirinin yüngül növünü seçərək Piruz Dilənçidən «Bakıdan çıxmamaq barədə» iltizam alınmasına qərar vermişdir.