قارداش وای !
پيروز ديلنچی


بؤيوک بير ديارام، بؤيوک تورپاغام،
واحيد بير ميللتم، واحيد بايراغام،
اؤزبکم، قيرقيزام، تورکم، قازاغام،
قارداش وای، سويداش وای، اوبام، ائليم وای!
وطندن وطنه گئدن يولوم وای!

دربندم، تبريزم، آنکارايام من،
کاشغرم، کرکوکام، گؤر هارايام من...
ايکی يه بؤلونموش آستارايام من،
آراز وای، مفتيل وای، سرحد تئليم وای!
وطندن وطنه گئدن يولوم وای!

هر يانا اوز توتسان، من او ياندايام،
زنگاندا، موغاندا، ناخچيواندايام،
تورکمن چايدايام، گولوستاندايام،
قلم وای، ايمضا وای، ساختا قولوم وای!
وطندن وطنه گئدن يولوم وای!

موشفيقم، جاويدم*، گولله لنميشم،
هئيکله دؤنموشم، داشا دؤنموشم،
اولويام، ناحاقدان بئله سينميشام،
گولله وای، اعدام وای، ناحاق اؤلوم وای!
وطندن وطنه گئدن يولوم وای!

بير ياندا بايراغيم ياساق اولوندو،
بير ياندا چکيجله اوراق اولوندو،
من تورکم - دئين لر دوستاق اولوندو...
ياساق وای، قيفيل وای، کسيک ديليم وای!
وطندن وطنه گئدن يولوم وای!

بابکم، نبی يم، لاپ چينگيزم من،
ده ده قورقودام من، سازام، سؤزم من،
کولون آلتينداکی يانار کؤزم من،
آلوو وای، آتش وای، سؤنموش کولوم وای!
وطندن وطنه گئدن يولوم وای!

هر يئرده، هر ياندا بير بارماغيم وار،
شرقدن غربه دک باخ، داياغيم وار،
سازلی بورچاليم وار، قاراباغيم وار،
باغيم وای، باغچام وای، سولموش گولوم واى!
وطندن وطنه گئدن يولوم وای!

بير داها کيمسه يه باش ايمز ائليم،
نه روسا، نه فارسا اييلمز بئليم،
زنجيره چکيلمز، باغلانماز قولوم،
قيريلميش زنجير وای، آچيق قولوم وای!
وطندن وطنه گئدن يولوم وای!


ميکائيل موشفيق و حوسئين جاويد سوئتلر دؤنمينده «پان تورکيست» دامغاسی ايله گولله لنميش آذربايجان شاعيرلری.