اصلينی داندين ! (ساتيرا) خئيروللاه حق بئيگی (ساپلاق) ياستی - ياپالاق فارسجا دانيشماقدا نه گؤردون؟! ای بابکين اؤولادی، نئچون اصلينی داندين؟! اويدون يارامازلار فئلينه، اولدون اويونجاق، آنجاق نه بيليم، بلکه ده آفشيندن اوتاندين! هرزه سو کيمی هر يئته نين آرخينا آخدين، تورکون گؤزونه جبر ايله ياد گؤزلويو تاخدين، شيمشک اولالی، اؤز کؤکونو آتشه ياخدين، افسوس اولا کی، تاريخی سن ترسينه قاندين! تورکون اولوسو بير قوجامان جانی چيناردی، اولدوز کيمی پارلاق بو ائلين کئچميشی واردی، بيز داغ اولالی، اؤزگه سی بير محره ديواردی، داغدان چئويريب اوز، نييه ديواره داياندين؟! آچ تاريخی بو ائلده اولان غئيرته بير باخ، تومروس آنادا دالغالانان جورأته بير باخ، قورقودبابا، ستار آتالی ميللته بير باخ، بيگانه لرين تؤهمتينه يوخسا ايناندين! بيگانه بيزه مکر ايله تؤهمت داشی آتدی، بير عيدده چاشيب اؤزلويونو اؤزگه يه ساتدی، آلچالتدی اؤزون، اؤزگه لری عرشه اوجالتدی، سؤيله گؤره ليم بؤيله ساتيشدا نه قازاندين؟! تاريخده شرافتله بويانميش ايزيميز وار، مئيداندا بوکولمز قولوموز، سرت ديزيميز وار، شؤهرتلی باکی، شانلی گؤزل تبريزيميز وار، آخير، آ گولوم، سن نييه باخديقجا اوساندين!