قورتولوش آتشی يحيا شئيدا قفسده قانادی سينميش بير قوشام، وارليغيم داغ- داشا، چؤله باغليدير. ياشارام گله جک باهار عشقينه، حياتيم چمنه، گوله باغليدير. قفسده اولسام دا، کسيلمز سسيم، سؤنمز بو قفسده عشقيم، هوسيم، اؤلنده، دئيه جک بو سون نفسيم: اوره ييم بير شيرين ديله باغليدير. قورتولوش آتشی قلبيمده يانير، دوشدوکجه ياديما، شام تک اودلانير، عاريفلر بو سؤزو دئمه دن قانير: ييخيلماز هر کس کی ائله باغليدير. شئيدايام، تورپاغا، وطنه وورغون، بولبول تک باهارا، چمنه وورغون، گؤللره، گوللره، گولشنه وورغون، اوره ييم ساز کيمی تئله باغليدير.