ديليم منيم ! خالق شاعيری سؤهراب طاهير اينقيلابين دوداقلاری آراسيندا آلوو ساچان ديليم منيم! آزادليغين قاپيسينی ۱۹۲۰- ده، ۱۹۴۶- دا، تای - تای آچان ديليم منيم! او قيلينجين تييه سينه، او آنامين نغمه سينه، بَلَکله نيب گولن ديلدير! قيزيل گولون، آخار سويون، هر بير خالقين، هر بير ديلين، اؤز ديلينی بيلن ديلدير! منه دؤيوش صنعتينی، اؤيرتميشدير او هر زامان. فيضولينين، ستتارخانين آغزينداکی ديله قوربان، ديلينده کی ديله قوربان! او سوسارکن آياقلانيب، او ووروشوب، پارلاقلانيب، اؤز دؤيوشگن غورورويلا ابدييَت اولوب ديليم! قيلينج لارين ياراسيندان، مَرميلرين قَلپه سيندن، پاراسيندان، دؤيوش نيشانی آليب ديليم! وئر ديليمی، آل جانيمی! من اؤلمه رم ديليم اولسا! وئر ديليمی، تؤک قانيمی! من ياشارام ديليم اولسا! وئر ديليمی، آل گؤزومو! من گؤره رم ديليم اولسا! چونکی تاريخ يازماميشدير، اؤلوم آدلی سؤز ديليمه! من آنامی، من آتامی، من بالامی - قوربان وئررَم اؤز ديليمه! گه رک غضب، گه رک دؤيوش - نيداسييلا دولا ديليم! باشقاسينين الينده يوخ، - اؤز آغزيمدا اولا ديليم! آنجاق ديليم قاداغاندير - اؤز يوردومدا بيلن منيم! آغزيمداکی حالقا - حالقا شاققيلدايان زينجيرلردير، دمير اولوب، زينجير اولوب ديليم منيم!