ياشا طالعيم! (باکی سفری موناسيبتی ايله يازيلميش شعرلر سيلسيله سيندن) کريم مشروطه چی (سؤنمز) بير عؤمور وفالی يولداشيم کيمی، ياشادين منيمله قوشا طالعيم! بو عؤمرو من اؤزوم ياشاياممازديم، منی سن ياشاتدين، ياشا طالعيم! گئجه نی - گوندوزو خيالا دالديم، بير ايتگين سئودانين سوراغين آلديم، نه قدر خوشبختم، اؤلمه ديم، قالديم، چاتدی اينتيظاريم باشا، طالعيم! بودور، من آلوولار اوجاغيندايام، باکينين مئهريبان قوجاغيندايام، قيش ايکن، عؤمرومون شن چاغيندايام، وار يئری ايلهاميم جوشا طالعيم! اؤزوم ده بيلميرم نئجه گلميشم، گوندوزمو گلميشم، گئجه گلميشم، آخی من نه يم کی، وئجه گلميشم؟! آز قالير عاغليم دا چاشا، طالعيم! يازا مئيدان اوخور بو پاييز چاغيم، اولدوزا بات! - دئيير اوميد چيراغيم، ائله چاغلايير کی، سئوينج باغلاريم، آز قالير باشيمدان آشا طالعيم! قيرخ ايلليک حسرتلر قوووشان کيمی، بيز قوجاقلاشيريق تاپيشان کيمی، گؤی اولدوز ياغديرير کهکيشان کيمی، دويغولار گلنده جوشا طالعيم! سؤزلری سسله نير اؤز سؤزوم کيمی، وطنه سئوگيده لاپ اؤزوم کيمی، نه قدر دوغمادير تبريزيم کيمی، بو شکی، شاماخی، شوشا، طالعيم! سانيرام اهرده، يا موغاندايام، گاه داغی گزيرم، گاه آراندايام، سانکی سهندده يم، ساوالاندايام، باخاندا هر داغا، داشا، طالعيم!