QURTULUŞ ATƏŞİ Yəhya Şeyda Qəfəsdə qanadı sınmış bir quşam, Varlığım dağ-daşa, çölə bağlıdır. Yaşaram gələcək bahar eşqinə, Həyatım çəmənə, gülə bağlıdır. Qəfəsdə olsam da, kəsilməz səsim, Sönməz bu qəfəsdə eşqim, həvəsim, Öləndə, deyəcək bu son nəfəsim: Ürəyim bir şirin dilə bağlıdır. Qurtuluş atəşi qəlbimdə yanır, Düşdükcə yadıma, şam tək odlanır, Ariflər Bu sözü demədən qanır: Yıxılmaz hər kəs ki, elə bağlıdır. Şeydayam, torpağa, vətənə vurğun, Bülbül tək bahara, çəmənə vurğun, Göllərə, güllərə, gülşənə vurğun, Ürəyim saz kimi telə bağlıdır.